2013年3月30日 星期六

[忽然1周 922 ENTERTAINMENT] 姦出頭李家聲有路隨時走 娛樂八卦 忽然1周




媽咪姐

姦出頭李家聲有路隨時走

上周,新劇《仁心解碼 II》首播,一出場交代電話推銷員李家聲喺鬧市又跑又叫兼企圖跳橋自殺,最後佢和盤托出強姦咗學生妹石天欣。成個過程有聲有畫,李家聲嘅粗暴癲狂演出更惹嚟網友激讚。

早幾日,媽咪姐喺電視城撞到李家聲,佢就好謙咁話:「估唔到個回響咁大,好少可第一場個布局就擺咗個 case出嚟,同埋個尺度推到咁盡。編劇咁寫我仲開心,咁先有戲做。」講到有冇意欲離巢,今年 46歲、 87年入行嘅李家聲實話實說:「我唔鍾意周圍跑,成日飛嚟飛去返大陸幾個月又唔想,自己鍾意留喺香港。(王維基有冇搵你?)兩年前有搵過,嗰陣我啱啱應承咗無綫留低,咁應承咗人就唔應該反悔,咪做到依家。不過我今年 9月底約滿無綫㗎喇,但佢哋(無綫)仲未搵我,睇下邊個賞識我囉。都要維持生計!人哋 offer好嘅,始終都要走。」咁就梗係啦!搵食搵食,搵到錢先有得食㗎。

網民同傳媒連日大讚佢扮強姦犯表現出色。李家聲都係喺微博講咗句:「多謝大家支持!」表現低調。

李家聲(左一)同鄭伊健(右二)係第 13期 TVB藝員訓練班同學,今日都仲好 friend。 87年,佢哋同郭富城(右一)齊齊去內蒙古拍劇集《成吉思汗》,嘩!個個都好有肌喎!

過嚟我度啦!大把世界。(設計對白)

《仁心 II》變態佬出位!

李家聲喺《仁心 II》喊到面都紅曬,然後又出力箍實女學生,嚇到媽咪姐個心蔔蔔跳呀!

好多人睇完李家聲嘅實力演出,即刻上網勁讚,仲話佢大材小用㖭。

色魔初現

94年,李家聲已經拍電影《屯門色魔》,拎住水壺電話嘅佢,眼神渙散,好入戲。