2013年3月30日 星期六

[忽然1周 922 ENTERTAINMENT] 哥哥紀念騷 學友打頭陣 朝偉神秘壓軸 娛樂八卦 梁朝偉 朝偉 忽然1周




滾熱辣

哥哥紀念騷 學友打頭陣 朝偉神秘壓軸

《繼續寵愛.十年 Miss You Much Leslie》紀念演唱會可謂群星拱照,張學友、陳慧琳、張智霖、周慧敏及草蜢落實演出,但哥哥生前經理人陳淑芬同時向外大賣關子,表示還有一名神秘嘉賓。本刊得悉,神秘嘉賓就是梁朝偉。

搞到偉仔咁神秘,原來並非陳淑芬意願。事緣陳淑芬和偉仔 08年在哥哥紀念演唱會上發生誤會。偉仔覺得陳淑芬不尊重哥哥,兩人近日才因為紀念哥哥逝世十周年破冰。將名字保密,是偉仔答應出席演唱會的條件。

哥哥逝世十載之群星撐場

在哥哥紀念騷前,陳淑芬不停發功,繼預告開騷公開哥哥死前口訊,又指有神秘嘉賓,令演唱會備受關注。今次紀念騷,暫定張學友打頭陣,中段就會安排陳慧琳唱一段快歌 Medley,最後由梁朝偉唱壓軸,希望現場氣氛達至高峰。

事實上,梁朝偉與哥哥張國榮私交甚篤,在電影《春光乍洩》有親密合作, 03年哥哥逝世時,梁朝偉傷心不已。近日受訪時,偉仔亦直言不時夢見哥哥:「呢十年我久唔久會諗起佢,佢仲會經常喺我夢裏出現,如果你心裏面有呢個人,佢去咗邊又有乜所謂!」

梁朝偉在五年前哥哥紀念音樂會上,獻唱一曲〈風繼續吹〉。為了完美向哥哥致敬,綵排時他甚為着緊,自言比拍戲埋位更加緊張。

周二( 25日),記者詢問偉仔會否出席哥哥紀念演唱會,偉仔說:「我會去。(會唱乜嘢歌?)到時你就知!」問到是否唱壓軸及跟陳淑芬曾有誤會,他就笑而不答。

十周年紀念音樂會有大量哥哥紀念品,當中兩款記事簿更分別刊印了哥哥與唐唐回頭微笑及一齊食雪條的照片。

今次紀念活動還會推出 1比 6的珍藏 figure,全球限量 3,000個,售價$1,680,附件有一張導演凳。陳淑芬表示哥哥生前想做導演,今次算是為哥哥圓夢。

死忌講生日快樂

本月 14日,陳慧琳到佐敦,為出席哥哥的紀念演唱會試歌衫。工作湊仔兩忙的她,要飲咖啡提一提神。

五年前,梁朝偉亦是哥哥紀念騷的表演嘉賓,今次刻意低調,皆因當年偉仔在紀念騷的後台,與陳淑芬發生誤會。

「梁朝偉當年出席嘅音樂會喺 4月 1日搞,而陳太(陳淑芬)當時已構思喺 9月,即係哥哥生日時再搞多次。難得當日好多巨星出席紀念活動,陳太諗住叫人喺後台搵啲星拍定片段,叫佢哋對住鏡頭講『哥哥,生日快樂』,順便作為之後 9月宣傳音樂會時用。偉仔入到後台至知要拍片,即時好愕然。當時佢粒聲唔出行開咗,後來佢黑曬面同人講,做乜喺哥哥死忌當日講生日快樂!」知情者說。

嘉玲學友做說客

偉仔冇拍到段宣傳片,而當年的「生忌演唱會」亦搞唔成。雖然偉仔冇向陳淑芬詐型,但之後就好少同陳淑芬接觸,直至早前陳淑芬籌備哥哥逝世十周年演唱會,偉仔初時都愛理不理,後來陳淑芬搵佢老婆嘉玲及學友做說客,偉仔才答應出席。

「偉仔同哥哥好 friend,陳太梗係想佢出席。咁加上有嘉玲、學友幫陳太做和事老,自然事半功倍。而且陳太早已爆響口,話搞埋十周年紀念活動後,未必再搞哥哥紀念活動。偉仔諗住可能係最後一次,於是打番俾陳太話自己想唱,不過要求保密,事前唔可以用佢嚟做宣傳。」偉仔可憑歌紀念哥哥,陳淑芬可為哥哥做好件事,歌迷又多把靚聲聽,都算三贏!

歌神肉緊

張學友曾唱哥哥的〈追〉,相信在音樂會上也會再唱,練歌時「歌神」已十分肉緊,令人期待他的演出。

玉女下海

周慧敏與哥哥曾合拍電影《藍江傳》,今次是她首次參與哥哥紀念音樂會。

近年貴為歌後的容祖兒,首次參與哥哥的紀念活動,向他致敬及懷念。

Chilam聲似

五年前,張智霖在紀念哥哥音樂會上,開腔唱〈有誰共鳴〉及〈有心人〉,被指歌喉有八成似哥哥。

右:搞手陳淑芬

紀念騷陣容勁

草蜢在五周年紀念演唱會上也有份獻唱。

紀念哥哥的演唱會年年都有,不過數星光熠熠,自然是陳淑芬在今年及 08年搞的兩次。陳淑芬在 08年搞嘅紀念哥哥逝世五周年演唱會,出席歌手包括張學友、陳潔靈、陳奕迅、莫文蔚等。而去年環球唱片也舉辦音樂會,安排旗下歌手林子祥、莫文蔚、黃耀明、李克勤等演繹哥哥金曲,隨後推出《浮想聯翩張國榮》專輯。

至於歌迷會 Red Mission每年都會舉辦紀念音樂會,過往亦曾邀請黎小田、林憶蓮、林子祥及倫永亮等人出席,今年的音樂會則於 4月 2日在文化中心舉行。

撰文:娛樂組

攝影:攝影組