2013年4月5日 星期五

亞視節目腰斬爆拖糧 50萬 盧覓雪鬧爆:上錯賊船




娛聞樂

亞視節目腰斬爆拖糧 50萬 盧覓雪鬧爆:上錯賊船

由 IMEG傳訊媒體製作、於亞視播放的節目《娛樂 CIA》,因兩公司的合作糾紛,於 2月 27日突然腰斬。事後爆出 IMEG拖糧近 50萬元,受影響的一眾主持,包括盧覓雪、路芙、鄭啟泰等人,已於 3月 22日到灣仔小額錢債審裁處申請索償,並已自行出信控告 IMEG欠薪。

今次領軍追討欠薪的盧覓雪慨嘆表示,她入行多年未曾試過被拖糧:「我真係老貓燒鬚、上錯賊船呀!」

兩公司的糾紛背後,其實亦影響了一眾節目主持。原來他們由去年 12月開始已被 IMEG拖糧,當中以盧覓雪和陳樹鵬金額最多,合共達三十萬,路芙和 Otto各被欠 6萬,而鄭啟泰則因為較精明,見 IMEG拖糧超過 2個月就一直主動追數,所以他只被欠 2萬多。

日前,本刊記者跟盧覓雪等人面對面做訪問。對拖糧一事,盧氣憤地說:「傾合約時我已經好小心,份合約為期 3個月,要每個月出糧,起初佢哋( IMEG)好準時,所以我都不以為意,不過到 2月頭,我先發現 12月開始嘅人工都冇出,到準備去追嘅時候個節目就停播。當時 IMEG嘅製作高層李生話,等會計計好後 3月 6日有糧出,但一推再推去到 3月 16日都未見有消息。當了解之後發現原來有多人都同我一樣,所以我哋先拉大隊去小額錢債審裁處之嘛。我做咗咁多年嘢,真係未試過咁樣囉,今次真係老貓燒鬚、上錯賊船呀!」

人生第一次受騙囉!﹙真實對白﹚

路芙從事娛樂資訊工作多年,還是第一次被拖糧,她坦言下次若有類似的製作公司搵都會照做,皆因搵外快亦只有這個途徑。

咁少人工,都欺詐我哋!﹙真實對白﹚

經過此事後,鄭啟泰稱面對現今商業社會感到可悲,想像不到香港今時今日還有如此無良的製作公司,出現拖糧情況。

盧覓雪向本刊展示她跟 IMEG營運總裁李子頌( Edwin)的短訊。可見對方一直在跟進事件,但無奈公司董事未能配合,最後 Edwin更提議他們作正式追討,說可給公司會計多點壓力。

3月 22日,《娛樂 CIA》一行五人(左起: Otto、盧覓雪、路芙、鄭啟泰和陳樹鵬)到灣仔小額錢債審裁處申請索償。《蘋果日報》圖片

路芙:連累打工仔

董敏莉去年主持《娛樂 CIA》時,因爆肚指亞視「無收視」,即時被 OUT,現時 IMEG還欠她 5千元。《蘋果日報》圖片

在旁的路芙插口說:「佢哋兩間公司發生問題,唔應該連累到我哋呢啲打工仔嘛!做咗嘢無理由冇糧出㗎?」而鄭啟泰則稱是次事件是一個警惕,但為兩餐都要硬住頭皮做,只好再加兩錢肉緊追數。

據知至本刊截稿為止,《娛樂 CIA》一眾主持仍然收不到錢,他們亦擔心該製作公司會清盤,最後就連渣都無。現時他們惟有等待5月8日再一次上小額錢債審裁處跟進。

亞視承認收律師信

其實,今次《娛樂 CIA》是負責製作的 IMEG主動提出腰斬。據知亞視在審視節目時,發現有藝人如張家輝、杜汶澤、甄子丹等作出批評亞視的言論,遂要求 IMEG刪除該片段才能播出,當中涉及多集節目內容。而 IMEG有感亞視幹預其編輯自主,雙方就此未能達成共識,最後 IMEG主動停播節目。 IMEG事後亦發信向亞視追討賠償。

本刊聯絡了亞視高層葉家寶作回應,葉承認確實收到 IMEG發出的律師信,但坦言電視台有權審批節目內容,「係。我哋係有收到信,律師仍在處理中,但內容就唔方便透露,當中係有涉及金錢同商業問題。(亞洲電視有無幹預節目《娛樂 CIA》嘅編輯自主?)作為一間持牌嘅電視台,我哋有必要審批所有節目製作,對令亞視形象受損嘅內容,係會建議刪剪。我哋亦有一定權力咁樣做,佢哋( IMEG)最後都係同意。(知唔知 IMEG拖欠合約主持嘅人工近 50萬?)亞視同 IMEG只係簽咗製作方面嘅合約,佢哋點樣去請節目主持我哋係唔會理,但出糧係應有責任嚟嘅!」

王征自入主亞視後,風波浪接浪,自去年遊行反對政府發新免費電視牌照後,今次又因幹預外判製作公司而接律師信,腳頭的確唔太好。《蘋果日報》圖片

杜汶澤今日已變身成為電影人兼電影製作公司老闆,面對亞視封殺一點感覺都沒有。對於好友盧覓雪被拖糧問題,他相信對方經驗夠識處理。

杜汶澤:土共電視台

記者亦致電問過被亞視點名列入黑名單的杜汶澤,他卻笑眼看待,還表示已很久沒看該台節目。「依家佢(亞視)嘅製作方針係點?好土共嘅電視台囉,不過就冇咩影響嘅!因為唔係有好多人睇。而我自己就好敬佩佢(亞視),都已經冇人睇仲要為咗原則,連影帝級嘅張家輝都要 cut,真係好有骨氣囉!」此外杜汶澤更不忘力撐盧覓雪:「呢啲勞資糾紛嘅嘢, Michelle做咗咁多年,一定知點處理嘅。」

《娛樂 CIA》 1點收視

亞視這個外判綜藝節目,主打直播娛樂資訊及踢爆娛樂秘聞,由去年 8月開始逢星期一到星期五晚晚播。當日盧覓雪坦言被直播節目所吸引才答應主持。去年年尾,節目由鄧特希接管後,加入了人物深情專訪和飲食環節。

節目中還有個爆料環節,曾經爆「飛魚」和「餅女」秘婚後離婚,暗指方力申同鄧麗欣,及後引起報紙雜誌跟進,算是較有話題的內容。可惜,就算有料爆收視最高時都只得 1點,不過也算是「零」的突破。

《娛樂 CIA》不時揭露娛樂八卦新聞,是節目一大特色,可惜收視依然不濟。

去年 8月,節目開播時,一眾主持、亞視執行董事盛品儒和 IMEG負責人李子頌都有出席記者會,估唔到節目下場是被腰斬。

撰文:娛樂組

攝影:攝影組


. 亞視節目腰斬爆拖糧 50萬 盧覓雪鬧爆:上錯賊船
http://hittt.blogspot.com/2013/04/50.html
. 亞視節目腰斬爆拖糧 50萬 盧覓雪鬧爆:上錯賊船
http://hittt.blogspot.com/2013/04/50.html
. 亞視節目腰斬爆拖糧 50萬 盧覓雪鬧爆:上錯賊船
http://hittt.blogspot.com/2013/04/50.html
Related Posts Plugin for WordPress, Blogger...