2013年4月26日 星期五

面書攤牌舒淇馮德倫分手




媽咪姐

面書攤牌舒淇馮德倫分手

媽咪姐幾時都話,樣靚身材正唔代表搵到幸福,最重要係命水。啱啱過咗 37歲生日嘅舒淇,公認係性感女神喇啩,偏偏感情生活零舍崎嶇過人。先有黎明一段地下情,跟手嚟個馮德倫,可惜三離三合,到舊年年初先話翻撻成功。蜜運期嘅佢哋,每隔幾日就自動波喺微博調情耍花槍,兩個人仲試過俾人影到去東京同泰國蜜遊㖭!

人到中女,又難得搵到個啱嘴形,媽咪姐以為舒淇今次會修成正果啦!點知前兩日,舒淇竟然喺 facebook寫咗段水蛇春咁長嘅攤牌宣言,其中有幾句更夭心夭肺到不得了:「承諾就像放屁,當時驚天動地,過後蒼白無力。」而最可圈可點嘅都係呢句:「現在的我,你愛理不理,記住了,以後的我,你高攀不起!」

舒淇面書分手語錄

舒倫戀向來低調, 2012年 7月,兩人罕有斷正,被拍得喺東京拍拖。

2012年 11月,拍緊《太極 1從零開始》嘅馮德倫,主動喺微博大曬跟女友舒淇嘅合照,間接向外界默認兩人戀情。

嘩!舒小姐講到咁白,舒倫戀睇怕都冇得𢺳。查實舒淇 4月中生日,都已經孤伶伶自己慶祝。媽咪姐收到風,佢哋分手導火線,係因為兩個人拍《太極 1》嗰陣,舒淇竟然當眾批評男友劇本亂,搞到馮德倫冇曬面,雙方仲冷戰一輪。撞啱舒淇舊相好黎明離婚,全人類期待黎舒復合,舒淇又答得曖昧,馮德倫梗冇癮啦,仲三日唔埋兩日唔覆機。男人靠唔住,舒淇咪局住喺 facebook爆響口分手囉!

估唔到玩唔夠兩年,舒淇又打回原形做剩女。見佢尋尋覓覓得個吉,媽咪姐冇樣冇身材,好在仲有個死佬錫,上天係公平嘅!

早排生日嘅舒淇獲眾好友祝賀,但獨欠男友馮德倫,被指感情有問題。

有指《聶隱娘》因資金問題而停工,女主角舒淇冇男友又冇工開,啱啱就飛去美國治情傷,自拍機艙沉思照。



. 面書攤牌舒淇馮德倫分手
http://hittt.blogspot.com/2013/04/blog-post_7908.html
. 面書攤牌舒淇馮德倫分手
http://hittt.blogspot.com/2013/04/blog-post_7908.html
. 面書攤牌舒淇馮德倫分手
http://hittt.blogspot.com/2013/04/blog-post_7908.html