2013年4月26日 星期五

鄧萃雯恐懼症復發 反口推劇玩殘志偉




滾熱辣

鄧萃雯恐懼症復發 反口推劇玩殘志偉

萬眾期待,《金枝慾孽貳》相隔 9年終於面世,可惜收視低開 24點。期望愈大,失望愈大,令劇中孭飛的鄧萃雯近日再度壓力爆煲。早前她接受林以諾牧師訪問時,亦承認因拍此劇引爆「恐懼症」。

坦言被情緒病困擾的鄧萃雯,強調以信仰治病。但據知新劇未播出前,她已經開始情緒失控,連夜失眠兼面容浮腫,連教會都少返。

3月初,原本她答應志偉不計前嫌重返無綫,為他監製的新劇《 Aerobic Girls》擔正,但近日她突然反口唔拍。難怪提到雯女,志偉亦忍唔住呻咗句︰「今次拍女人劇比男人劇麻煩十倍!」臨時冇咗女主角,獎門人都被玩殘。

自去年尾拍罷《幗國 2》後,鄧萃雯因大牌揀幕後班底,與無綫關係一度冰封。直至曾志偉近日籌備在七月開拍的電視劇《 Aerobic Girls》,找毛舜筠、鄧萃雯及葉玉卿做女主角,而雯女因為志偉出手邀請,才心鬱重返無綫, 3月初雙方亦傾好條件,只欠動筆簽約。可惜卿卿因老公唔肯「放人」,角色改由陳慧珊頂上。不過好事多磨,原本已答應埋位的鄧萃雯近日因恐懼症復發,反口推拍,令志偉大傷腦筋,不過志偉並未放棄,繼續努力遊說對方。

上周二( 16日),志偉出席活動時,默認鄧萃雯有份拍《 Aerobic Girls》。他說:「遲啲會公布啦。(雯女會拍?佢咁難搞你都搞得掂?)唉!今次搞女人劇比男人劇麻煩十倍!」

不過,志偉一廂情願以為搞掂鄧萃雯時,事隔五日( 21日),鄧萃雯出席活動時卻突然反口話唔拍:「唔拍啦,因為檔期撞咗。」問到撞咗咩期?她卻以當日是宣傳《金枝貳》為理由,不欲多談。

自爆患病

早前鄧萃雯接受林以諾牧師訪問時,坦言自己 04年患上「恐懼症」。

鄧萃雯在兩輯《金枝慾孽》中,很多場戲都有四、五十張紙的對白要記,而她亦是在 04年拍《金枝》時患上恐懼症。

大陸劇失利

鄧萃雯一向謝絕應酬,本月初她罕有現身曾志偉的迪士尼生日派對。今次反口唔接志偉新劇,不似是忽然冇期咁簡單。《蘋果日報》圖片

其實鄧萃雯確實想拍《 Aerobic Girls》,月初更抽空出席曾志偉的迪士尼生日會,無奈病情反覆,加上她又不肯食藥,狀態欠佳之下,局住推劇。

「雯女嘅恐懼症 04年拍第一集《金枝》時已經開始有,加上當年全民支持下,佢都輸咗個視後俾黎姿,雯女一直放唔低。喺劉曉慶搭路下,雯女喺 08年開始返內地拍劇。拍第一套《牌坊下的女人》喺內地收得,本來諗住轉攻大陸市場。不過 10年佢套內地劇《新還珠格格》就滑鐵盧,令佢情緒低落。

「到 11年拍《金枝貳》時,套劇日日飛紙仔,廠期又趕,雯女每日趕工仲要記成四、五十張紙嘅對白,加上佢對自己要求太高,令佢恐懼症發作。早前佢知道要宣傳《金枝貳》,啲無形壓力返曬嚟,情緒大上大落。加上志偉咁耐仲未出到劇本俾佢睇,雯女都知自己情況,左諗右諗,最終反口唔拍。」

鄧萃雯人前極力抑壓病情,《金枝貳》男角黃德斌都話:「雯女包袱最大,因為只有佢貫穿兩套劇,對白又長又多,比拍一般劇辛苦。」至於飾演她胞妹的伍詠薇都話:「佢係對自己要求好高,同佢做對手戲我都有一定壓力。」

3月 14日心事重重

上月 14日,本刊發現鄧萃雯獨自在佐敦午膳。食肆內她不時對牆呆望,離開時她亦看似神不守舍。

殘爆整車

食完午餐,鄧萃雯去長沙灣車房攞車,她與相熟的車房師傅吹水吹足一小時,看來要吐的苦水確實好多。

人前風騷

雖然鏡頭後殘爆,不過一出席活動(本月 21日),鄧萃雯就表現風騷,餵陳豪食嘢,不愧視後。

自爆缺乏愛

鄧萃雯 96年因和已婚的江華拍《我和春天有個約會》而撻着。她不單背上小三之名,更被江華夫婦開記招數臭。

事實上,鄧萃雯入行多年圈中密友並唔多,一直只有羅慧娟及陳法蓉,隨着羅慧娟逝世,她可傾訴的好友更買少見少。

早前她接受林以諾牧師《另類聊法》訪問時,自爆 04年已患上「恐懼症」,更提到因為父母離異,令她一度有戀父情意結。難怪她剛出道便與大她 9年的萬梓良拍拖。至於最傷的還是 96年錯愛江華,「三十歲嘅時候,突然醒一醒,覺得唔可以咁樣……冇幸福㗎……點解我咁容易愛上人,咁易相信人愛我,係因為我太餓,明知快餐冇益唔會考慮咁多。」

教友透露︰「其實雯女唔係冇男人埋身,但佢對愛情冇信心,有人追都當睇唔到。呢幾個月佢都好少返教會,成日匿喺屋企。我哋都擔心佢個病(恐懼症)。」感情空白加上事業阻滯,令鄧萃雯病情反覆。早前她被傳媒拍到往找同樣受過「恐懼症」折磨的教友張堅庭訴苦,可見現實的她鬱結難紓。

次次睇唔開

鄧萃雯多年來不平則鳴,在 04及 06年輸視後時更暗寸對手出術。雖然佢次次選視後都話平常心,扮唔緊張,其實次次都睇唔開。

04年講反話

憑《金枝慾孽》如妃奪「實力非凡大獎」,面對鏡頭,她強顏歡笑說:「我好喜歡呢個獎!」對於輸俾簽約換獎的黎姿又明寸:「個獎對佢咁重要,俾佢啦!」

06年寸阿佘

有傳佘詩曼與 TVB高層飯局爭獎,鄧萃雯寸爆:「依家至 9月,咁早食咪要食到年尾?」最終雯女輸俾阿佘,不過《女人唔易做》全年收視最高。雯女再發功:「呢個榮譽比得獎仲開心!」

恐懼症易翻發

周日( 21日)晚上雯女到佐敦茶餐廳食晚餐,只見她面部浮腫,有一雙大黑眼圈。

精神科醫生陳世貿指出,恐懼症( Panic Disorder)屬遺傳病,病因源自壓力。患者會無故突然感到強烈的驚恐,好像快要死亡及完全失控。陳醫生話:「『鬆弛練習』及『認知療法』都係有效嘅治療方法,至於用藥物治療就至少要食 3至 6個月,否則易翻發。一般患者會長期翻發,嚴重更會產生抑鬱。」

劇情率先睇

如妃喪子變魔

由如妃(鄧萃雯)所生的五阿哥,因為得了如妃家族遺傳的「血友病」而流血不止,延醫多時終告不治。五阿哥病逝,令如妃心態轉變,開始成魔之路。

湘菱為主擋箭

湘菱(蔡少芬)漸漸取得如妃的信任,後來為救如妃,湘菱更以左手為她擋箭。育有三名子女的湘菱,雖與不和的「油瓶女」木都兒(龔嘉欣)和解,最終卻未能和親生子女團聚。

淳太妃孤獨死

萬人迷高流斐(陳豪)入宮表演,芳心寂寞的淳太妃(伍詠薇)禁不住誘惑,如妃於是安排湘菱勾引高流斐。高流斐發現如妃計謀,於是反過來引誘如妃,最後兩人戲假情真,而淳太妃就要在冷宮中孤獨終老。

網友圍插

網友對《金枝貳》基本上一致劣評,收視低開 24點,其中葉翠翠及苟芸慧更被彈演技不及格,甚至鄧萃雯亦被彈老態畢現。反而新加入的蔡少芬,可能有新鮮感,被不少網友讚她壓得住場。

撰文:娛樂組

攝影:攝影組


. 鄧萃雯恐懼症復發 反口推劇玩殘志偉
http://hittt.blogspot.com/2013/04/blog-post_9923.html
. 鄧萃雯恐懼症復發 反口推劇玩殘志偉
http://hittt.blogspot.com/2013/04/blog-post_9923.html
. 鄧萃雯恐懼症復發 反口推劇玩殘志偉
http://hittt.blogspot.com/2013/04/blog-post_9923.html
Related Posts Plugin for WordPress, Blogger...