2013年10月10日 星期四

獨家最新 劉華齋戒半年求子 朱麗倩現肚產檢




25/9朱麗倩在診所逗留了約一小時進行例行產檢,見她身形發福,腹部更隆起。

娛頭

獨家最新 劉華齋戒半年求子 朱麗倩現肚產檢

五十二歲的劉德華,去年五月得償所願,老婆朱麗倩為他誕下愛女劉向蕙( Hanna),得一想二,恨仔恨到出曬口,上月底劉華生日,公開生日願望:希望可以再生多個。

向來謹慎的劉華,從不信口承諾,講得出想生多個,當然十拿九穩!

據了解,四十七歲的朱麗倩生完囡囡後,經過中西醫雙料調理配合,以及求神許願齋戒半年,終於成功再陀 B三個月,兩星期前,本刊更影到肚凸凸的朱麗倩,由保鏢傍身到中環做產檢。

其他影片
爆響口有咗

日前劉德華出席 Cartier手錶活動時,突然爆響口,暗示自己即將再做爸爸。

當問到他會否將珍藏手錶傳俾下一代?他竟然答:「會傳俾我個女,我不知道,現在可能還有其他呢……哈哈哈……不過現在只有一個,沒有收埋。(生日願望係咪想生多個?)當然希望可以,睇緣分,這是其中一個生日願望。」其實劉華已經願望成真!上月二十五日下午兩點半,本刊發現劉華老婆朱麗倩,在一名貼身保鏢陪同下,現身中環中建大廈,當日由於劉華未有同行,朱麗倩未有選擇搭貨𨋢走秘道,反而大方坐客𨋢上樓。

身形發福

做例行產檢,在診所逗留了接近一小時,離開時,朱麗倩同保鏢有講有笑,著住鬆身衫的她腹部微隆,當一陣風迎面吹來時,肚凸效果更加明顯,孕味甚濃。

「陀第一胎嗰陣,劉華成日陪老婆做產檢,佢喺度目標更大,所以會小心啲,次次都搭貨𨋢,仲會揀醫生未正式開診嘅時段,晨早八點鐘陪老婆做檢查,因為咁先可以避開同其他客人一齊。其實今次劉太做檢查,都專登 book咗食 lunch時間,少啲人,冇咁礙眼。」知情者說。

打扮樸素的朱麗倩沒有好似其他闊太周身名牌,最貴只有手持的 BV手袋,而她似乎趕時間,離開時問保鏢幾點。

今年五月朱麗倩同劉華到筲箕灣佛堂拜佛四小時求子,未有身孕的華嫂身形仍纖瘦。

太太產檢當日,因為晚上要出席 Cartier活動,所以沒有陪老婆一齊去。

接受記者訪問時,劉華破例講家事,叫他追仔時,他表示:「所有祝福一一收曬,一切順其自然,感激大家。」

高齡風險

一般女性超過 35歲懷孕,便是高齡產婦,娛樂圈中亦出現過不少高齡產婦,除今年 47歲的朱麗倩外,當中包括吳君如及李嘉欣等,都是四十出頭先大肚。

易肥易糖尿

高齡產婦比 20多歲的孕婦容易肥胖,患上糖尿病機會亦高,因此,高齡產婦必須戒口,避免吃甜味劑和人工添加劑的食物,另外要多做運動,增強正退化的體骼幫助生產。此外,覆診次數要至少一星期一次,經常監察孕婦的體重、血壓和血脂,醫生更指出, 45歲以後懷孕的,有一半孕婦存在流產危機,而成功的大多數都要剖腹產子。

41歲(備注:懷孕時歲數)

40歲(備注:懷孕時歲數)

開心說漏嘴

據知,雖然朱麗倩懷孕剛夠三個月,但劉華為謹慎起見,就算夠三個月,依然收埋喜訊,好似上一胎,劉華都等到五個多月,才在歌迷會網站以「吾家有喜」向外宣布做老豆。

「其實華仔都仲未同身邊啲 friend講老婆又有咗,淨係得親戚先知呢件喜事,不過佢真係好開心,有時不自覺會漏少少口風,好似之前答你哋(記者)話生日願望係想生多個咁,試諗吓,佢咁深思熟慮,點會隨便講啲咁嘅說話,俾老婆咁大嘅壓力。以華仔性格,佢唔成功嘅事,唔會咁容易講出口!」劉華身邊人說。

一一年朱麗倩懷有第一胎,劉華都經常陪伴產檢,但每次都十分大陣仗,要保安封閉現場。

生了 Hanna初期,因為加多利山大宅裝修,劉華一家三口搬到尖沙咀服務式住宅暫住,女兒每次出入都要行貨𨋢秘道。

中西合璧

不過,劉華這一胎絕對得來不易。朱麗倩已經四十七歲高齡,臨近更年期邊緣,為趕及標尾會,兩公婆都用盡方法。

今年八月,朱麗倩就被發現到銅鑼灣睇中醫莊純傑,調理身體,朱麗倩自己睇之外,劉華亦是睇同一個中醫,定期食中藥強身。

中藥調補身體,同一時間,再搵西醫幫助,食藥打針增加排卵量, check住排卵期,以便一擊即中。

除了中西醫雙管齊下,向來虔誠拜佛的劉華夫婦,經常到筲箕灣祥德寺佛堂求神禮佛。一一年,朱麗倩成功懷孕,劉華夫婦多次被發現到佛堂酬謝神恩,又捐錢做功德。

據知,劉華為求再有第二胎,為劉家添個慈姑椗,為表求子誠心,兩公婆一齊食齋半年,直到朱麗倩成功懷孕,她才食番少量肉,增加營養吸收。

「其實醫生有提議過佢哋接受人工受孕,可以增加懷孕機會,不過華仔好傳統,點都接受唔到,同埋佢覺得自己先五十二歲,身體仲好 fit有心有力,所以始終用番自然方法。搞掂!」劉華身邊人說。

蘇偉基醫生開設的「保澤輔助生育中心」是香港著名提供不育輔助的私人醫療集團。

日前朱麗倩被影到與工人現身油麻地街市。

本週二,朱麗倩的工人(左)與兩名親戚到街市幫朱麗倩買餸,當中大部分是疏菜,只有小量肉類。

生仔秘方

昔日傳統思想要繼後香燈,個個都想生仔,接掌家業;怎樣才能生仔,坊間流傳有不少方法。

飲食秘方

有指孕婦想生仔,男方要清茶淡飯食菜為主;女方更要多吃鹽,多吃鹼性和高鉀食物,例如香蕉、蒜頭、番薯等,生仔機會較高。

排卵期

在經期結束後行房一次,之後男方要禁慾儲備 Y精子,等到排卵期當日,子宮頸會分泌出鹼性液體令 Y精子更活躍, Y精子可以較 X精子快一步到卵子,令生仔機會大好多。

煞停巡迴

老婆生仔大曬!劉華已經大幅減產,未來半年只按計劃做巡迴演唱會,也不會學似以往密集式不停站唱,做完一站後,一定要有緩衝時間,讓他返香港陪屋企人一兩個星期,才再做下一站。

據知,因為老婆有咗,劉華準備再一次將巡迴煞停,做完十二月尾台灣站後,便暫停工作,包括電影。只為陪實老婆安胎,一起迎接劉家新成員。

劉華的願望就是有一仔一女湊成一個好字,現在願望終於有望達成。

劉華對上一次(一一年)開巡迴,做了幾站後,老婆突然有喜要暫停,今年剛剛開始再巡迴,老婆又再度有喜,認真巧合。

今年八月朱麗倩在幾名保鏢防護下,到銅鑼灣睇中醫,保鏢全程在藥房外把守。

一向恨仔的劉華就算見到其他人的 BB仔,都愛不釋手攬住狂錫。

一追再追

娛樂圈將再爆發新一輪生 B潮,生完一個,自然想再追生多個,唔少星爸星媽望四甚至已經過四張,生就趁手。

陳奕迅、徐濠縈

早前陳奕迅開到口想追個蛇 B,囡囡康堤亦想要個妹妹一齊扮靚,但現年 39歲的徐濠縈話要緊守三字頭唔生,到 40歲先考慮生多個。

楊千嬅、丁子高

39歲楊千嬅去年為丁子高誕下愛兒 Torres後,已定下三年抱兩計劃,追多個事在必行。

黎姿、馬廷強

現年 42歲的黎姿, 2010年為富商馬廷強誕下孖女,去年 10月再生埋細女 Pegella,據知,黎姿想再接再厲,為馬家追到「慈菇椗」先收工。

針對性檢查

除基本的例行檢查,高齡產婦還要做一些針對性的檢查,以確保母子平安。懷孕數星期後,要抽染色體檢查遺傳基因會否出產畸胎,還要進行特定的檢查,例如母血唐氏症篩查、羊膜腔穿刺、絨毛膜取樣等,其中絨毛膜取樣可進行一些細胞及先天疾病分析,但風險較大,導致胎兒流產率約 2%,是爭議性較大的一項檢查。



. 獨家最新 劉華齋戒半年求子 朱麗倩現肚產檢
http://hittt.blogspot.com/2013/10/blog-post_2866.html
. 獨家最新 劉華齋戒半年求子 朱麗倩現肚產檢
http://hittt.blogspot.com/2013/10/blog-post_2866.html
. 獨家最新 劉華齋戒半年求子 朱麗倩現肚產檢
http://hittt.blogspot.com/2013/10/blog-post_2866.html
. 獨家最新 劉華齋戒半年求子 朱麗倩現肚產檢
http://hittt.blogspot.com/2013/10/blog-post_2866.html
Related Posts Plugin for WordPress, Blogger...