2013年10月17日 星期四

[FACE 334 本地娛樂] 戒夜蒲學油畫 佘詩曼買細樓轉瘟畫師




今年 5月,阿佘約埋好友周家怡等,到銅鑼灣一間 Art Jam畫室學畫畫。阿佘雖然素顏上陣,但皮膚同個樣都 keep得唔錯。有錢有樣,搵男友或老公應該難佢唔到。

封面

戒夜蒲學油畫 佘詩曼買細樓轉瘟畫師

被曾志偉封為「七妖女」之一的佘詩曼,同 TVB約滿後頻頻北上掘金,賺到笑不過繼續 dry爆冇拖拍。

眼見身邊好姊妹如湯盈盈、周家蔚等逐個嫁, 38歲阿佘亦恨拍拖恨到出面。一向喜愛夜蒲的阿佘,最近修心養性,盡量收斂爛玩性格,更開始學畫油畫,希望用藝術氣質引仔,上星期更被影到跟一位 6呎高、個樣有啲似周傑倫的畫師於灣仔約會。

感情有着落,阿佘 5個月前再擲 7百幾萬買入紅磡 800呎細樓。揸住 3層物業,一共市值 7千萬樓在手,男友係邊個,有錢或冇錢又有乜所謂?

其他影片

絕跡蒲點

阿佘出名「劈」得同玩得,每次 TVB班藝人開 P,都見佢玩到起碼半夜先走人。但自從最近迷上畫畫,已經幾乎絕迹夜場。

自從 09年與鄭嘉穎分手,佘詩曼一直未搵到真命天子, dry足 4年,身邊一班好姊妹輪住結婚,湯盈盈同周家蔚更做埋媽咪,惟獨最靚又最本事的阿佘依然單身。

學畫畫洗底

還有兩年便 40歲,女人始終都想搵個好歸宿,所以阿佘近來積極搜刮筍盤。過往愛蒲愛劈極爛玩的阿佘竟然 180度大轉變,愛上健康生活。阿佘除了親自下廚煮住家飯,又學埋畫畫,因此結識到約 6呎高、個樣有點似周傑倫的畫師,早前更被傳媒影到兩人於灣仔撐枱腳兼同車走,更疑似拖埋手仔。

難得搵到高大威猛又有才華的理想對象,阿佘當然要盡力保護戀情,「個男仔係藝術家,佢幫我畫 9條魚等屋企裝修好掛起佢……不過佢好叻,所有有才華嘅人我都欣賞,暫時冇諗有冇發展機會喎!」

阿佘當日揀咗畫羊,由於佢之前冇學過畫畫,所以有啲姐手姐腳,最後更要畫室老闆(左)出馬教佢點畫。

心花怒放

最近風騷到暈嘅阿佘,連自拍都嘴角含春。網上圖片

處女羊羊

5月去完銅鑼灣 Art Jam冇耐,阿佘即將「羊羊」作品 po上微博。原來 5月佢先開始學畫畫,就咁睇畫工都唔差嘅。網上圖片

抽象示愛

第 2幅作品叫「愛」,睇得出阿佘當時充滿愛意。網上圖片

揸 7千萬物業

愛情有着落,而一向本事的阿佘原來亦冇停過投資。本刊更發現阿佘於今年 5月以 786萬買入紅磡新盤昇禦門一個 811呎、 2房低層單位,一反阿佘愛買千呎以上大宅的習慣。新屋去年才落成,設有豪華會所,幾年後更會有港鐵;連同早前購入的畢架山帝景峰及跑馬地紀雲峰,阿佘手持共 3個物業,市值 7千萬元,假以時日分分鐘變億萬富婆。

昇禦門由新鴻基等發展,位處紅磡黃金地段,呎價最平也接近 1萬元,由於紅磡將來會有港鐵到達,所以引來一班投資者入市。

電髮含春

上週三( 9日)阿佘同助手飛車入機場,疑似 walk-in買機票即飛,雖然被記者發現,但阿佘都笑曬口,心情靚爆。

點知喺國泰 check-in櫃位企足 20分鐘,阿佘都冇辦法登機,即刻面燶燶同助手坐番保母車出市區返屋企。

「我都想過億」

投資有道,阿佘有本錢揀劇拍,明年 1月才重返娘家,同林峯、苗僑偉等開拍新劇《使徒行者》。今年 8月以 5千萬簽畀由無綫同內地公司組成的 TVBC,阿佘講明最大條件係要有足夠自由度。

週日( 13日)阿佘同陳敏之、森美為新劇《使徒行者》拍 TVB節目巡禮預告,聽到記者提起新物業,富婆佘即笑曬口企定定解答!

F:《 FACE》 佘:佘詩曼

F:係咪買咗新樓?紅磡昇禦門呀?

佘:你點知㗎?我買嚟唔係自住,我見嗰區環境唔錯,兩年後又有港鐵,幾有升值潛力。你幫我寫好啲,等我賣到高啲價啦!

F:你揸住 7千萬物業喎,幾時買夠過億?

佘:我都想!不過我未有錢再買,所以𠵱家咪要出嚟做嘢賺錢囉!

賺到錢再買樓,搵畫師男友畫多幾幅畫當佈置囉!

正式回巢

回流娘家拍宣傳片,阿佘被傳媒圍問新戀情,雖然否認,不過個樣甜到漏。

北上兩年搵完「人仔」,阿佘正式回歸娘家,週日就拍住森美、敏之為新劇《使徒行者》喺將軍澳拍節目巡禮宣傳短片。

曬砵仔糕

人逢喜事性格都隨意啲,阿佘最近出席活動大意露咗「砵仔糕」,都笑騎騎同記者講:「記得打格!」打咗仲邪喎!

冧讚新歡

佢係藝術家,好叻!(真實對白)

38歲阿佘班圈中密友湯盈盈、鍾麗淇和梁靖琪都嫁曬,做「姊妹」做到厭,心急拍拖在所難免。

賺多過蝕

演技出色,估唔到佘詩曼炒樓一樣掂。喜愛投資物業,雖然 04年賣鴨脷洲深灣軒微蝕過 22萬,但 11年賣出北角海景台寓所,大賺 868萬。現時手持過 7千萬物業,即刻退休都得啦!



.[FACE 334 本地娛樂] 戒夜蒲學油畫 佘詩曼買細樓轉瘟畫師
http://hittt.blogspot.com/2013/10/blog-post_6633.html
.[FACE 334 本地娛樂] 戒夜蒲學油畫 佘詩曼買細樓轉瘟畫師
http://hittt.blogspot.com/2013/10/blog-post_6633.html
.[FACE 334 本地娛樂] 戒夜蒲學油畫 佘詩曼買細樓轉瘟畫師
http://hittt.blogspot.com/2013/10/blog-post_6633.html
.[FACE 334 本地娛樂] 戒夜蒲學油畫 佘詩曼買細樓轉瘟畫師
http://hittt.blogspot.com/2013/10/blog-post_6633.html