2015年4月2日 星期四

半億包團法國小島行禮  Baby黃曉明 10.1結婚 [壹週刊 - 1308] 曉明,Angelababy,Baby,黃曉明,M1,


過去一年多,黃曉明專登減少工作量,帶 Baby出遊十次環遊世界,為正式拉埋天窗熱身。 娛頭 半億包團法國小島行禮  Baby黃曉明 10.1結婚 去年開出期票,今年娶 Angelababy過門的黃曉明,上月悉心安排在女友生日 party上求婚成功,婚期定在今年 10月 1日國慶日,在法國小島行禮,準新郎打算以 Baby一向憧憬的王子公主式夢幻婚禮冧老婆外,更會豪花半億包團,請至親好友現場見證。 一見鍾情 拍拖五年,即使黃曉明偶有跟其他女星傳緋聞,但與 Angelababy打風唔甩!為對外確認女友是自己的終極對象,去年黃曉明人肉到港,送林寶堅尼為女友慶生,自製大龍鳳!自此,兩人不時公然晒恩愛,再無避忌。「 Baby同曉明開始拍拖都係得廿歲,佢係相信一見鍾情嗰隻,曉明雖然大 Baby十一年,但佢識氹女友,又鍾意搞花臣製造驚喜,知道女友鍾意玫瑰花,佢可以搞到成間酒店房都係,有時又會喺 Baby不知情下,失驚無神出現敲門。拍拖以來,每年 Baby生日一定有神秘 party,絕冇話拍拖時間耐咗,心思少咗!」黃曉明身邊人說。最近,黃曉明被拍得在夜場唱 K,因為場中還有大班女伴而被指飛甩女友夜蒲,但 Baby卻對男友投信任票,二人更加唱雙簧,黃曉明先在微博留言:「我是黃曉明。」 Baby隨即回應:「我是夜店。」快將做人妻的 Baby,高調撐男友。 今年 2月 28日,黃曉明趁 Baby生日求婚成功,壽星女許願時,他興奮到 V晒扮鬼臉。 六卡鑽戒求婚 今年二月二十八日, Baby廿六歲生日,身在美國與楊冪拍攝電影版《何以笙簫默》的黃曉明,忙中亦花盡心思,為女友安排生日 party,還私底下請了 Baby多位好友,秘密飛到當地為她慶生。「因為唔只係幫 Baby慶祝生日咁簡單,曉明專登請埋 Baby幾個好朋友過去美國,因為佢準備咗隻六卡鑽戒向女友求婚。雖然上年都公開講咗話今年會娶 Baby,但曉明唔想求其,所以做足準備求婚,搞到 Baby感動到喊晒!」 去年 Baby 25歲生日,黃曉明與 Baby經理人夾計,突然神秘現身送上價值 230萬林寶堅尼,還手執大束玫瑰氹女友。 週一( 30/3)網上流傳曉明唱 K俾女圍照片,黃曉明與 Baby微博晒默契。 今年情人節,有網友發文暗示 H姓男星劈腿,黃曉明即上載與 Baby雪地合照闢謠。 北京青島再擺酒 求婚成功,婚禮已落實今年十月一日舉行,地點首選充滿浪漫情調的法國小島。「婚禮日期係曉明揀嘅,揀國慶日完成人生大事,因為佢都覺得呢個日子好有意義,加上曉明認為國慶有假期,方便親戚朋友出席婚禮。原本曉明有諗過喺家鄉青島行禮,再喺北京擺酒,但 Baby覺得一生人一次嘅婚禮,一定要浪漫,曉明亦明知女友喜歡王子公主式浪漫,所以改去法國小島搞婚禮,之後先再返青島同北京擺酒。「距離婚禮仲有半年時間,有關婚紗禮服同場地布置,曉明都親自構思,甚至每套晚裝禮服都會有特定珠寶配襯,有好多籌備工作要處理,單係揀布置場地嘅玫瑰花,曉明都嚴選出產地品種,佢話要俾最好嘅 Baby!」 黃曉明好友趙薇,已答應出席 10月 1日的世紀婚禮。 Baby孭飛主持爆紅節目《奔跑吧!兄弟》,黃曉明撐女友做節目嘉賓。 阿媽催婚 事實上, Baby和黃曉明拍拖以來,身邊仍不乏追求者,但 Baby對海綿蛋糕專心一意,加上女友和父母又相處融洽,令孝順的曉明,更加認定 Baby是他不二之選。「拍拖無耐,曉明已經帶 Baby見父母,佢係個孝順仔,好多時會帶埋父母一齊去旅行, Baby亦從來唔介意,二人世界變四人行;之前傳過曉明爸爸唔鍾意 Baby根本亂講,尤其係曉明媽咪,都成日催過個仔結婚。」知情者說。 黃曉明身家豐厚,籌備婚禮同時,亦已在北京買下物業,作為婚後愛巢。 早已融入黃家的 Baby,不時陪黃曉明返青島探親。 署名老婆 坦言第一眼見 Baby,就覺得對方好靚的黃曉明,早已認定女友,一三年十一月黃曉明生日,二人已經舉行了訂婚派對,當天 Baby打扮如新娘子,送男友的生日蛋糕下款亦以「老婆」署名。「前兩年曉明已經同身邊啲朋友講想同 Baby結婚,但考慮到女友仲好細,喺內地又有好多機會,所以曉明等女友專心發展事業,而家 Baby喺內地已經好紅,企得好穩陣,就算結婚,都唔會有影響。」知情者說。 年三十晚,二人齊包餃子晒恩愛。 去年黃母生日,黃曉明攬實 Baby與父母影全家福。 鍾意送禮物給女友的黃曉明, 11年打本百萬給 Baby開餐廳, 13年再送三千萬貝沙灣,絕不手軟。 財路多 13年 11月,黃曉明慶生兼與 Baby訂婚,當日 Baby就以「老婆」署名送上蛋糕。 身家億億聲的黃曉明已躋身內地富豪榜,去年更在「福布斯中國名人榜」由第八位急跳至第四。除拍戲拍廣告外,持有華誼兄弟 1.5億股的黃曉明亦擅長投資,包括房地產、紅酒、醫療、高爾夫球場等生意,去年他與李冰冰等人合資火鍋生意,財路又多又通,絕對是內地鑽石級筍盤。 相愛五年 09年, Baby在北京工作期間,透過朋友認識黃曉明並相約唱 K,有傳當晚 Baby已被極速生擒,二人在唱 K途中失蹤兩小時。戀情爆出,二人死口唔認,但其後愈愛愈高調,不時公開大讚對方, Baby更將男友改名「海綿蛋糕」,戀情逐步浮面。拍拖 5年,有指男方身邊小三多到數唔晒,二人曾一度傳出「分訊」,有指闊綽的黃曉明為箍煲豪擲三千萬送貝沙灣,冧女招層出不窮的他,每年 Baby生日都出盡法寶, 10年送 99支玫瑰及 Mac機電腦; 11年送 999支玫瑰及有錢都未必買到的限量版 Hermes,去年,黃曉明更人肉速遞到港,神秘現身將自己連同二百三十萬林寶堅尼送給女友,並高調拖實 Baby,正式公開關係。 世紀婚禮 要留下一世難忘回憶,婚禮便要與別不同,圈中不少富豪級情侶,不惜大灑金錢,到外地舉行夢幻式世紀婚禮。周杰倫、昆凌台灣天王周杰倫與昆凌拉埋天窗,舉行了三場世界巡迴婚禮,先在英國古堡舉行王子與公主童話式婚禮,上月,再於男方主場的台北 W酒店,將泳池變成夢幻遊樂園;今月初,再到新娘家鄉澳洲黃金海岸嚟多 round,估計三地婚宴,耗資近八百萬港元。 梁朝偉、劉嘉玲08年,梁朝偉和劉嘉玲於不丹 Uma Para舉行世紀婚禮,包下整間酒店,邀請過百賓客連機票食宿,豪擲五千萬,當中包括圈中好友王菲和林青霞。 徐子淇、李家誠06年,徐子淇下嫁恒基太子爺李家誠,二人於澳洲悉尼歌劇院對岸的 Royal Botanic Gardens舉行億元婚禮。
Related Posts Plugin for WordPress, Blogger...